Warra Badii
Gaafa tokko niitiin tokko dhirsishii manaa deemuu didee karaa jaalalleeshii argattu dhabde. Achumaan mala baafatte. Malli kunis, dhirsa ishiitiin, "yaa ilma aayyaa! torban har'aa obboleettiin tiyya Finfinneedhaa nan dhufa jettee natti ergitee ka'eetan farsoo naqaa," jetteen. Dhirsichis, "haa ta'u kaa," jedheen. Ishiin achumaan jaalallicha bira dhaqxee akkana jetteen, "shaashii, kophee, jaanxilaafi wandaboo nadheenii uffadhuuti nadheen fakkaadhuu koottuu" jetteen.
Jaallichis akkuma ishiin jetteenitti nadheen fakkaatee yommuu uffatee dhaqu ishiin, "obboleetti tiyyatu dhufe," jettee dhungatte. Dhirsichis "nooraa," jedhee manatti galchee hoolaa qaleef. Niitittiinis battaluma sana farsoo kenniteefii dhirsa ishiitiin akkana jetteen, "ani har'a obboleettii tiyya wajjinan taphachaa bulaa atimmoo mucaa kee wajjin godoo harrootaa sana bulaa," jetteenii abbichi dhaqee bule.
Niitiin ganama kaatee buna danfiftee, koochee gootee mucaadhaan, "dhaqii abbaa kee waamii," jetteen. Mucaan, "lakkii ani hin waamu, kochee kana naa kennitu malee" jedheen: niitittiinis kochicha kenniteefii, "dhaqii waamii," jetteen. Mucichi, "koottuu buna dhugii siin jette," jedheenii battaluma sana gara manaatti deebi'e.
Abbichis kochee mucaan harcaase sana guuraa yommuu buna dhuguu dhaqu niitiin agartee, "abbaan kee maal guuraa garana deema gurbaa?" jetteen. Mucichis, "kan halkan gochaa bultan saniif dhagaa guura kaa!" jedheen. Niitittiin nu rukuta jettee battaluma sana jaalallee ishii sana wajjin kaachoo jalqabde. Dhirsichi, yommuu kaatan argee, "maa kaatan gurbaa,?" jedheen. Mucichis, "waan ati goote saniif si jibbitee kaatti kaa!" jedheen. Abbichis "maaloo ! maaloo ! lammata itti hin deebi'uu koottu, koottu," jechaa duuba kaate. Mucichi kocheefi buna qophaa'e sana nyaatee dhuge. Isaan sadeenuu wal qabatanii badan, jedhama.
Support Afoola.com
Hojii aadaa fi afoola babbareedoo uummata guddaa kanaa dhalootaaf dabarsuuf hojjannuuf nu gargaaraa!
